හුස්ම රැළ්ල හා විසිරුණු මනස (භාවනාව ගැන ඉගෙන ගනිමු. දෙවන කොටස)

පලමු ලිපිය නොකියවුයේ නම්  ඔබට ඒ සදහා මෙතැනින් පිවිසිය හැකිය. හුස්මරැළල හා විසිරුනු මනස (භාවනාව ගැන ඉගෙන ගනිමු .පලමු කොටස.) 

ගියවර ලිපියෙන් අචන් චා හිමියන් මුණ ගැසෙන්නට පැමිණි. මහාචාර්‍ය වරයෙකු උන්වහන්සේගෙන් භාවනාව ගැන ඇසු ප්‍රශ්ණ හතරක් හා ඒවාට අචාන් චා හිමියන් දුන් පිළිතුරු ගැන සිහිපත් කරන ලදි. අද එතැන් සිට.

අප ආහාර ගැන දන්නෙමු. අහාර ගන්නේ කුමක් සදහාද යන්න ගැනද අපට අවබෝධයක් ඇත, ආහාර ගන්නේ කෙසේ ද යන්න ගැනද අප දැනුවත් වන අතර ආහාර ගැනීමෙන් අපට ලැබෙන දේ එනම් ශරීරය ශක්තිය වර්ධනය හා දිවි පැවැත්වීම ගැන අප දැනුවත්ම සිටිමු. එය එසේ නොවේද.? එසේ නම් ඔබේ ජිවිතයේ පැවැත්ම වෙනුවෙන් ඔබේ ආහාර ගැනී‍ම කොයි තරම් දුරට බල පාන්නේද , ඒ හා සමාන බලපෑමක් භාවනාව තුලින් ඔබේ මනසේ සැනසුම පිණිස සහනය පිණිස ශක්තිය හා සතුට උපකාර වේ.

අප ජිවිතයේ නොයෙක් දුක් වේදනා විදිමින් ‍අප්‍රමාණ වෙහෙසක් ගන්නේ මේ සතුට ලබා ගැනීම පිණිසමය. එසේ නමුත් අප නොමනා සේ කතා කරන්නට යාමෙන් හා ක්‍රියා කරන්නට යාමෙන් ද සිතන්නට පෙළඹීමෙන්ද අප අහිමි කරගන්නා වටිනාම දේත් අපගේ සතුටයි. සොම්නසයි. ඔබට කෙතරම් මුදල් තිබුණද, දේපල වස්තුව තිබුණද , ඤාතීන් සිටියද, ඔබේ සිත කනස්සල්ලෙන් නම් , ඔබේ හිත දුකට පත්වී නම්, ඔබේ හිත ලතැවිල්ලෙන් නම් ඔබේ සතුට තවදුරටත් ඔබ සමග නොපවතී. මෙය අද්දැක තිබේද. ඔබට මතක නැති විය නොහැකිය. එය සැබැවින්ම ඔබ අද්දැක ඇති සත්‍යයකි. නමුත් ඔබ එය ඒ අයුරින් මෙතෙක් කල් දැක නැතුවා විය හැකිය.

මතක තබා ගන්න. ඔබ බාහිර ලෝකය පුරා යමින් සෙව්වද ඔබට සැබෑ සැනසුම ‍සතුට සොම්නස කිසි දිනෙක බාහිර ලෝකය තුලින් නොලැබේ. ඒවා ලබා ගැනීම පිණිස කල යුතු වන්නේ ඔබේ අභ්‍යන්තර මනෝභාවය පිළිබද අවබෝධයක් ලබා ගනිමින් , ඒවාට නොනිස අයුරින් හැසිරෙන්නට ඇති ඉඩ කඩ අසුරා දැමීමය. එය අපහසු කාර්‍යයක් නොවේ එය හරිම පහසුය අපහසුව ඇත්තේ එය නොව එය කරණ ක්‍රමවේදයන් පිළිබදව අප තවමත් නොදන්නා බැවිනි.

භාවනාව යනු කුමක්ද ?

භාවනා කලයුත්තේ ඇයි

භාවනා කරන්නේ කෙසේ ?

භාවනාවෙන් අපට ලැබෙන ප්‍රයෝජන මොනවාද

භාවනාව යනු මනසට ලැබේන පෝෂණීයම ආහර වේලයි. අපභාවනා කල යුත්තේ මනස දුර්වලව පවත්වා ගැනීම අපගේ සැපයට සතුටට සොම්නසට විශාල හානියක් එම දුර්වල මනස සිදු කරන නිසාය. අපගේ සිත තුල වතින නොයෙකුත් දුක් සහ‍ගහ හා දොම්නස් සහගත මනෝ භාවයන්ට හේතුව ඇත්තේ දුර්වල ශක්ති හීන මනසයි. එබැවින් මනසේ ශක්තිය වර්ධනය කර ගැනීම පිණිස අප භාවනා කල යුතු වෙමු. එය අපගේ මනසට ලැබෙන ප්‍රණීතම ආහාර වේලයි.

මනස එයින් මහත් ප්‍රිතියට පත්වෙන අතර ඒ ප්‍රිතිමත් භාවය තුලින් ඔබව සැපවත් කරනු ඇත. බාහිර ලෝකයෙන් ඔබ ලබන යම් සතුටක් සැනසීමක් වේද ඒ සියළු සතුට සැනසුම ඉක්මවා ගිය ශාන්ත සුවදායි සුන්දර සැපතක් භාවනාව ඔබට උරුම කර දෙන්නේ ය. භාවනා කර නොමැති කෙනෙකු නම් ඔබට මෙය වටහා ගැනීමට වැඩි කාලයක් අවශ්‍ය නැත ඔබ විසින් විනාඩි පහලොවක් විස්සක් භාවනාවේ යෙදී බලන්න. එසේ භාවනාවේ යෙදී වාසය කරන ඔබ විසින් කල යුතු වන්නේ වඩාත් නිවැරදි අයුරින් භාවනාවේ යෙදී වාසය කිරීම පමණයි. එවිට ඔබට භාවානාව නැමති ප්‍රණීත වු මානසික ආහාර වේලෙන් ඔබට ලැබෙන සැපය හා ශක්තිය ගැන දැනුවත් භාවයක් ඇති කර ගත හැකිය.

මෙතෙක් අප විසින් මාහාචාර්‍ය වරයාට නොතේරුණු අචන් චා හිමියන් ආහාර මුල් කරගෙන පහදා දුන් විස්තරයට අනුව භාවනාව ගැන ඉගෙන ගත්තෙමු. දැන් අප භාවනාව යනු කුමක්දැයි දන්නෙමු. භාවනා කළයුත්තේ මක්නිසාද යන්න හා භාවනාවෙන් අපට ලැබෙන ප්‍රයෝජන මොනවාද යන්න ගැන කතා කර ඇත. භාවනා කරන්නේ කෙසේද ? අප හට තවදුරටත් කතා කරන්නට ඉතිරිව ඇත්‍තේ මෙයයි. භාවනා කරන්නේ කෙසේ ද යන්නට පිළිතුරු රැගෙන අප ඊළග ලිපියෙන් මුණ ගැසෙන තෙක් ඔබට තෙරුවන් සරණයි.